ৰিঙত ননমাকৈয়ে প্ৰি কোৱাৰ্টাৰত প্ৰৱেশ কৰিছে অসম কন্যা লাভলীনা বৰগোহাঁইয়ে ৷ টকিঅ’ অলিম্পিকত দেশক প্ৰতিনিধিত্ব কৰা লাভলীনাৰ প্ৰথমখন খেল আছিল ২৪ জুলাইত ৷ কিন্তু প্ৰথমখন মেচত বাই লাভ কৰি তেও পোনে পোনে প্ৰৱেশ কৰিছে প্ৰি কোৱাৰ্টাৰত ৷ প্ৰি – কোৱাৰ্টাৰত বক্সিঙৰ ৰিঙত তেও মুখামুখি হ’ব জাৰ্মানীৰ নাডিনা এপটেজৰ ৷ ২০১৬ আৰু ২০১৮ চনত বক্সিঙৰ বিশ্ব চেম্পিয়নশ্বিপত ব্ৰঞ্জৰ পদক বিজয়ী নাডিনা শক্তিশালী প্ৰতিদ্বন্দী ৷ কিন্তু নীৰৱ সাধনাৰে অলিম্পিকৰ বাট মোকলাই লোৱা ২৪ বছৰৰ লাভলীনা এই মুহূৰ্তত অতি আত্মবিশ্বাসী হৈ আছে ৷ নক আউট পাঞ্চেৰে বিশ্ববাসীৰ দৃষ্টি কাঢ়িবলৈ নিজকে সাজু কৰি তুলিছে লাভলীনাই ৷ লগত আছে অসমবাসীৰ অযুত প্ৰাৰ্থনা ৷ লাভলীনাই অসমৰ লগতে দেশক উজলাই তুলিবলৈ সক্ষম হ’বনে – এই প্ৰশ্নৰ উত্তৰৰ বাবে অপেক্ষা কৰিব লাগিব ২৭ জুলাইৰ দিনটোলৈ ৷ সেইদিনা টকিঅ’ অলিম্পিকৰ ৰিঙত নামিব গোলাঘাট জিলাৰ বৰপথাৰৰ জীয়ৰী লাভলীনা ৷