স্বাধীন ভাৰতৰ প্ৰথমগৰাকী প্ৰধানমন্ত্ৰী জৱাহৰলাল নেহৰুৰ আজি জন্মদিন ৷ ১৪ নৱেম্বৰৰ নেহৰুৰ জন্মদিনটোক শিশু দিৱস হিচাপে পালন কৰা হয় ৷ শিশুসকলৰ বাবে নেহৰু আছিল আপোন ‘নেহৰু খুৰা’ ৷শিশুৰ লগত থকা আত্মীয়তাৰ বাবেই তেওৰ জন্মদিনটো শিশু দিৱস হিচাপে পালন কৰা হয় ৷
১৮৮৯ চনত এলাহাবাদত জন্মগ্ৰহণ কৰিছিল জৱাহৰলাল নেহৰুয়ে ৷ তেওৰ জন্মৰ তিনি বছৰ পূৰ্বে গঠন হৈছিল ভাৰতীয় জাতীয় কংগ্ৰেছ ৷ পাছলৈ এইগৰাকী নেহৰুয়ে জাতীয় কংগ্ৰেছৰ নেতা হিচাপে ভাৰতৰ স্বাধীনতা আন্দোলনক সমুখৰ পৰা নেতৃত্ব দিয়ে ৷ স্বাধীনতা আন্দোলনৰ সময়ত তেও ৯ বছৰ কাৰাবাস খাটিবলগীয়া হৈছিল ৷ ১৯২৯ চনত তেও লাহোৰ অধিৱেশনত জাতীয় কংগ্ৰেছৰ সভাপতি হিচাপে মনোনীত হয় আৰু স্বাধীনতা লাভৰ পাছত দেশৰ প্ৰথমগৰাকী প্ৰধানমন্ত্ৰী হিচাপে নিৰ্বাচিত হয় ৷
আজি শিশু দিৱসৰ দিনটোত দেশৰ শিশুসকললৈ শুভেচ্ছা জ্ঞাপন কৰিছে ৰাষ্ট্ৰপতি ৰামনাথ কোবিন্দে ৷