বিগত ৩০ ডিচেম্বৰত চীনৰ বিদেশ মন্ত্ৰালয়ে অৰুণাচল প্ৰদেশৰ ১৫ টা স্থানৰ নাম সলনি কৰি এখন জাননী জাৰি কৰিছে ৷ লগতে এই ঠাইসমূহৰ নিজাববীয়া নামাকৰণো কৰিছে ৷ এতিয়াৰে পৰা চীনে নিজৰ মানচিত্ৰ আৰু দস্তাবেজত অৰুণাচল প্ৰদেশৰ এই ঠাইবোৰৰ নিজাববীয়া নামহে ব্যৱহাৰ কৰিব ৷ কাৰণ চীনে সদায়ে অৰুণাচল প্ৰদেশক দক্ষিণ তিব্বত বুলিহে গণ্য কৰি আহিছে ৷ শেহতীয়াকৈ চীনে নিজৰ স্থল সীমান্ত অঞ্চলক লৈ এখন নতুন আইন প্ৰণয়ন কৰিছে ৷ ২০২২ চনত পৰাই এই আইন কাৰ্যকৰী হৈছে ৷ চীনৰ বিদেশ মন্ত্ৰালয়ৰ মতে নতুন আইন অনুসৰি নতুনকৈ নামাকৰণ কৰা হৈছে ৷ সেই অনুসৰি অৰুণাচল প্ৰদেশৰ ১৫ টা স্থানৰ চীনে নতুন নামাকৰণ কৰিছে চিনী , তিব্বতী আৰু ৰোমন হিচাপে ৷ অৰুণাচল প্ৰদেশকো চীনে পূৰ্বৰে পৰা জাংগনান হিচাপে অভিহিত কৰি আহিছে ৷
চীনৰ নাম সলনিৰ এয়াই প্ৰথম প্ৰয়াস নহয় ৷ ২০১৭ চনতো চীনে অৰুণাচল প্ৰদেশৰ ৬ টা স্থানৰ নিজাববীয়া নামাকৰণ কৰিছিল ৷ সেই সময়ত দালাই লামাৰ ভ্ৰমণৰ প্ৰতিক্ৰিয়া হিচাপে চীনে এই কাম কৰিছিল ৷ চীনে নতুনকৈ নাম সলনি কৰা অৰুণাচলৰ ১৫ টা স্থানৰ ভিতৰত আছে ৮ খন চহৰ , ৪খন পাহাৰ , ২ খন নদী আৰু এটা পাহাৰৰ শৃংগ ৷ মুঠ ১১ খন জিলাক সামৰি এই ঠাইসমূহ বিস্তৃত হৈ আছে ৷ উল্লেখযোগ্য যে চীনে অৰুণাচল প্ৰদেশৰ মুঠ ৯০ হাজাৰ বৰ্গকিলোমিটাৰ অঞ্চলক নিজৰ বুলি দাবী কৰি আহিছে ৷ এতিয়াৰে পৰা চীনে নিজৰ মানচিত্ৰত অৰুণাচল প্ৰদেশৰ এই অঞ্চলসমূহক নিজা নামেৰে চিহ্নিত কৰিব ৷ ইয়াৰ ফলত ভাৰতৰ ভূখণ্ডত কোনো প্ৰত্যক্ষ প্ৰভাৱ নপৰে যদিও এনে ঘটনাই চীনৰ আগ্ৰাসী মানসিকতাকে পুণৰবাৰ প্ৰতিফলিত কৰিছে ৷ ইয়াৰ পৰাই সীমা বিবাদক লৈ চীনৰ নতুন দৃষ্টিভংগীৰো উমান পোৱা যায় ৷
নাম সলনিৰ দৰে প্ৰতিকাত্মক কামৰ বাবে ভাৰত চিন্তিত হোৱাৰ প্ৰয়োজন নাই যদিও চীনৰ নতুন সীমা আইনহে ভাৰতৰ বাবে চিন্তাৰ কাৰণ হৈ উঠিছে ৷ এই নতুন আইনৰ সপ্তম অনুচ্ছেদ অনুসৰিয়ে অৰুণাচল প্ৰদেশৰ ১১ জিলাৰ নাম সলনি কৰা হৈছে ৷ একেখন আইনৰ ৬২ নং অনুচ্ছেদত সীমা নিৰ্ধাৰণৰ পৰা সীমা সুৰক্ষাৰ কথা উল্লেখ কৰা হৈছে ৷ ২২ ন অনুচ্ছেদত সেনা অভ্যাসৰ কথা উল্লেখ কৰি কোৱা হৈছে যে যিকোনো আক্ৰমণ , অতিক্ৰমণ আৰু উচটনি কঠোৰভাৱে প্ৰতিৰোধ কৰিব লাগিব ৷ এই নতুন আইনে ভাৰত- চীন সীমান্ত যে অস্থিৰ কৰি ৰাখিব , তাৰ আভাস এতিয়াই স্পষ্ট হৈ পৰিছে ৷