বৃহৎ সালসলনিৰে সম্পন্ন হ’ল অসম চৰকাৰৰ মন্ত্ৰীসভাৰ ক্ষুদ্ৰ সম্প্ৰসাৰণ ৷ ভাগ্য উদয় হ’ল মুখ্যমন্ত্ৰীৰ ঘণিষ্ঠ বিধায়ক জয়ন্ত মল্ল বৰুৱা আৰু হাফলঙৰ বিধায়িকা নন্দিতা গাৰ্লোচাৰ ৷ প্ৰচলিত ব্যাকৰণ ভাঙি মুখ্যমন্ত্ৰী ড: হিমন্ত বিশ্ব শৰ্মাই কেৱল নলবাৰী জিলাৰ পৰাই দুজনকৈ বিধায়কক মন্ত্ৰীসভাত স্থান দিলে ৷ এখন জিলাৰ দুজন বিধায়কক মন্ত্ৰীসভাত স্থান দিয়াৰ উদাহৰণ প্ৰায় বিৰল বুলিয়েই ক’ব পাৰি ৷ কিন্তু মুখ্যমন্ত্ৰীৰ ঘণিষ্ঠ তথা বিশ্বস্ত হোৱা বাবেই জয়ন্ত মল্ল বৰুৱাৰ ক্ষেত্ৰত পূৰ্বৰ পৰম্পৰা প্ৰযোজ্য নহ’ল ৷ ধৰ্মপুৰৰ বিধায়ক চন্দ্ৰমোহন পাটোৱাৰী পূৰ্বৰে পৰাই কেবাটাও গুৰুত্বপূৰ্ণ বিভাগসহ হিমন্ত বিশ্ব শৰ্মাৰ মন্ত্ৰীসভাত আছে ৷ তাৰ পাছতো একেখন জিলাৰ পৰাই নলবাৰী সমষ্টিৰ বিধায়ক জয়ন্ত মল্ল বৰুৱাক স্থান দিয়া হ’ল মন্ত্ৰীসভাত ৷ কেৱল স্থান দিয়াই নহয় , কেবাটাও গুৰুত্বপূৰ্ণ বিভাগৰ দায়িত্ব লাভ কৰিলে জয়ন্ত মল্ল বৰুৱাই ৷ বৰপেটা জিলাৰ পৰা মন্ত্ৰীসভাত স্থান লাভ কৰা ৰঞ্জিত দাসৰ পৰা জনস্বাস্থ্য আৰু কাৰিকৰী বিভাগ কাঢ়ি আনি দিয়া হ’ল জয়ন্ত মল্ল বৰুৱাক ৷ জনস্বাস্থ্য কাৰিকৰী বিভাগে বৰ্তমান ৰূপায়ন কৰি আছে জলজীৱন মিছনৰ দৰে অভিলাষী আঁচনি ৷ এই আঁচনিৰ বাবে কেন্দ্ৰৰ পৰা আহিছে বৃহৎ পৰিমানৰ পুজি ৷ সেইবাবেই এই বিভাগটোৰ গুৰুত্ব অপৰিসীম ৷ জনস্বাস্থ্য আৰু কাৰিকৰীৰ দৰে গুৰুত্বপূৰ্ণ বিভাগ ৰঞ্জিত দাসৰ পৰা কৰ্তন কৰা বিষয়টোৱে আগন্তুক দিনৰ বহু অৰ্থৱহ ইংগিত বহন কৰে ৷ হয়তো মন্ত্ৰী ৰঞ্জিত দাসেও এই ইংগিত স্পষ্ট ভাৱে বুজি পাইছে ৷ যাৰ বাবে তেও মুকলিকৈয়ে আক্ষেপ আৰু বিষেদগাৰ প্ৰকাশ কৰিছে ৷
গুৰুত্বপূৰ্ণ বিভাগ হেৰুওৱা আন এজন মন্ত্ৰী হ’ল বিমল বৰা ৷ প্ৰাক্তন মুখ্যমন্ত্ৰী সৰ্বানন্দ সোণোৱালৰ ঘণিষ্ঠ হিচাপে পৰিচিত বিমল বৰাই শক্তি , ক্ৰীড়া , পৰ্যটন আটাইকেইটা বিভাগেই হেৰুৱাবলগীয়া হ’ল ৷ ডিব্ৰুগড় জিলাৰ পৰা মন্ত্ৰীসভাত স্থান লাভ কৰা বিমল বৰাৰ পৰা পৰ্যটন বিভাগ কাঢ়ি আনি জয়ন্ত মল্ল বৰুৱাক অৰ্পন কৰা হ’ল ৷ ইয়াৰ বিপৰীতে তেওক দিয়া হ’ল পূৰ্বে চন্দ্ৰমোহন পাটোৱাৰীৰ হাতত থকা উদ্যোগ আৰু বাণিজ্য বিভাগ ৷ লক্ষণীয় কথাটো হ’ল উদ্যোগ আৰু বাণিজ্য বিভাগ মন্ত্ৰী বিমল বৰাৰ হাতত অৰ্পন কৰিলেও উদ্যমিতা বিকাশ বিভাগৰ দায়িত্ব দিয়া নহ’ল বিমল বৰাক ৷ অথচ প্ৰধানমন্ত্ৰী নৰেন্দ্ৰ মোদীয়ে গুৰুত্ব দি অহা বিভাগটোৱে আছিল উদ্যমিতা বা দক্ষতা বিকাশ ৷উদ্যমিতা বিকাশৰ নতুন মন্ত্ৰী হ’ব জয়ন্ত মল্ল বৰুৱা ৷ মন্ত্ৰী বিমল বৰাই সংবাদমেল পাতি শক্তিখণ্ডৰ সফলতাৰ খতিয়ান ৰাজহুৱা কৰিছিল যদিও তেওৰ পৰা শক্তি দপ্তৰ কৰ্তন কৰি সেয়া অৰ্পন কৰা হ’ল নতুনকৈ মন্ত্ৰিত্ব লাভ কৰা নন্দিতা গাৰ্লোচাক ৷ মন কৰিবলগীয়া বিষয়টো হ’ল নতুন মন্ত্ৰীসভাৰ তালিকা প্ৰকাশ পোৱাৰ পূৰ্বে ভাইৰেল হৈ পৰিল শক্তি বিভাগৰ মন্ত্ৰী বিমল বৰাৰ এটা ফোন ৰেকৰ্ডিঙ ৷ য’ত তেও স্বীকাৰ কৰিছে যে অসম লোডশ্বেডিঙমুক্ত হ’বলৈ আৰু ৫ বছৰ লাগিব ৷ অৰ্থাৎ বিভাগ হেৰুওৱাৰ পূৰ্বেই যে বিমল বৰাই আত্মসমৰ্পন কৰিছিল , সেয়া তেওৰ ফোন কলটোৰ পৰাই স্পষ্ট হৈ পৰে ৷ কিন্তু মন্ত্ৰিত্ব কৰ্তনৰ পূৰ্বে কিয় এই ফোন কলটো ভাইৰেল হৈ পৰিল , সেয়া ৰহস্যৰ বিষয় হিচাপে বিবেচিত হৈছে ৷ তাৰ পাছতো বিমল বৰাই ৰঞ্জিত দাসৰ দৰে বিশেষ আক্ষেপ কৰা পৰিলক্ষিত হোৱা নাই ৷
মন্ত্ৰীসভাৰ আন বৃহৎ সালসলনিৰ ভিতৰত আছে চন্দ্ৰমোহন পাটোৱাৰীৰ হাতত থকা পৰিবহন বিভাগৰ দায়িত্ব দিয়া হৈছে পৰিমল শুক্লবৈদ্যক ৷ শুক্লবৈদ্যৰ হাতত পূৰ্বৰ দৰে মীন আৰু আবকাৰী বিভাগ আছেই ৷ আনহাতে পৰিমল শুক্লবৈদ্যৰ হাতত থকা বন আৰু পৰিৱেশ বিভাগৰ দায়িত্ব দিয়া হৈছে চন্দ্ৰমোহন পাটোৱাৰীক ৷পাটোৱাৰীৰ হাতত এক্ট ইষ্ট আৰু সংখ্যালঘু উন্নয়ন বিভাগো থাকিব ৷ বন আৰু পৰিবহন দুয়োটা বিভাগেই ৰাজ্য চৰকাৰৰ ৰাজহ সংগ্ৰহৰ অন্যতম উৎস ৷ এইক্ষেত্ৰত নতুন ভূমিকাত চন্দ্ৰমোহন পাটোৱাৰী আৰু পৰিমল শুক্লবৈদ্যই কিমান পাৰদৰ্শিতা দেখুৱাব পাৰে , সেয়া লক্ষ্যনীয় হ’ব ৷ আনহাতে বন বিভাগ ৰাজহ আহৰণৰ পথ হ’লেও বিভাটোৰ অনেক বদনামো আছে ৷ বিশেষকৈ বনজ সম্পদৰ চোৰাং বেহাই সততে সংবাদ মাধ্যমৰ শিৰোণাম দখল কৰে ৷ গতিকে বন বিভাগৰ দায়িত্ব লোৱাটো চন্দ্ৰমোহন পাটোৱাৰীৰ বাবে প্ৰত্যাহ্বানপূৰ্ণও হ’ব ৷ যদিহে পূৰ্বতকৈও বদনাম বা দুৰ্নীতিৰ অভিযোগ বাঢ়ে , তেনেহ’লে চন্দ্ৰমোহন পাটোৱাৰীৰ বাবে ই মুঠেও শুভলক্ষণ নহ’ব ৷ কাৰণ , মন্ত্ৰীসভাত তেওৰ জিলাৰ পৰাই আন এজন মন্ত্ৰী ইতিমধ্যে অন্তৰ্ভুক্ত হৈছে ৷
শেহতীয়া মন্ত্ৰীসভাৰ সালসলনিত অশোক সিংঘালে গুৱাহাটী উন্নয়ন দপ্তৰ হেৰুওৱাৰ বিপৰীতে অতুল বৰাই সমবায় বিভাগ আৰু যোগেন মহনে খনি আৰু খনিজাত বিভাগ হেৰুৱাবলগীয়া হয় ৷ গুৱাহাটী উন্নয়ন বিভাগ মুখ্যমন্ত্ৰীয়ে নিজৰ লগতে ৰাখে ৷ আনহাতে , আন দুটা বিভাগৰ দায়িত্ব লাভ কৰে নন্দিতা গাৰ্লোচাই ৷ এইদৰে নতুনকৈ অন্তৰ্ভুক্ত হোৱা দুয়োগৰাকী মন্ত্ৰীয়ে যথেষ্ট গুৰুত্ব লাভ কৰাৰ বিপৰীতে সামগ্ৰিকভাৱে ৰঞ্জিত দাস আৰু বিমল বৰাই গুৰুত্ব হেৰুওৱা পৰিলক্ষিত হ’ল ৷ একেদৰে চন্দ্ৰমোহন পাটোৱাৰীৰ বাবে নতুন দপ্তৰ হ’ব অতিশয় প্ৰত্যাহ্বানপূৰ্ণ ৷ বন বিভাগ পৰিচালনাত ব্যৰ্থ হোৱাৰ পৰিণতিয়ে পাটোৱাৰীৰ ৰাজনৈতিক কেৰিয়াৰক অস্তাচললৈ ঠেলি দিব পাৰে ৷