আজি ঘোষণা হ’ব নেকি – অসম প্ৰদেশ কংগ্ৰেছৰ পৰৱৰ্তী সভাপতিৰ নাম ? শুকুৰবাৰৰ দিনটোত ৰাজ্যৰ ৰাজনৈতিক চৰ্চা আৰম্ভ হৈছে এই প্ৰশ্নৰে ৷ শেহতীয়া লোকসভা নিৰ্বাচনত অসমত কংগ্ৰেছ দলৰ শোচনীয় পৰাজয়ৰ পাছত সভাপতি পদৰ পৰা পদত্যাগ কৰিছিল ৰিপুন বৰাই ৷ সেই সময়ত তেওৰ পদত্যাগ পত্ৰ কেন্দ্ৰীয় নেতৃত্বই গ্ৰহণ কৰা নাছিল ৷ কিন্তু নিৰ্বাচনৰ পাছতো দলটোত অব্যাহত আছে খহনীয়া ৷ নেতৃত্বৰ ওপৰত মুকলি ক্ষোভ প্ৰকাশ কৰি ইতিমধ্যে দল ত্যাগ কৰিছে মৰিয়ণিৰ বিধায়ক ৰূপজ্যোতি কুৰ্মীয়ে ৷ আনহাতে ,থাওৰাৰ বিধায়ক সুশান্ত বৰগোহাঁয়েও কংগ্ৰেছ এৰি বিজেপিত যোগ দিব বুলি সৰৱ চৰ্চা চলিছে ৷ এনে পৰিস্থিতিত দলৰ এই বিপৰ্যয় ৰোধ কৰিবলৈ অসমত নতুন সভাপতি শীঘ্ৰে নিযুক্তি দিয়াটো অতি জৰুৰী হৈ পৰিছে ৷ দলটোৰ শীৰ্ষ সূত্ৰৰ খবৰ অনুসৰি শুকুৰবাৰেই অসম প্ৰদেশ কংগ্ৰেছৰ নতুন সভাপতিৰ নাম ঘোষণা হোৱাৰ পূৰ্ণ সম্ভাৱণা আছে ৷ এইক্ষেত্ৰত চৰ্চাত আছে দুটা নাম – প্ৰদ্যুত বৰদলৈ আৰু ভূপেন বৰা ৷ তেওলোকৰ মাজৰ এজনেই অসম প্ৰদেশ কংগ্ৰেছৰ পৰৱৰ্তী নেতৃত্ব বহন কৰিব ৷