[quote title=”…আৰু আজি বিজেপি নেতৃত্বাধীন চৰকাৰৰ দ্বিতীয়টো কাৰ্যকালৰ প্ৰথম বৰ্ষপূৰ্তিত যদি মেন অৱ দ্য মেচ খিতাপৰ কোনোবা দাবীদাৰ আছে -তেওঁ একমাত্ৰ অমিত শ্বাহ ৷ প্ৰধানমন্ত্ৰী নৰেন্দ্ৰ মোদীৰ সোঁহাত আৰু সেনাপতি ৷” title_color=”” title_url=”” title_icon=”” title_icon_color=”” title_margin=”0px 0px 15px 0px” block_color=”” block_description=”” text_align=”center” author=”” link=”” desc=”” image=””][/quote]
♦অচিন্ত্য ভৰদ্বাজৰ কলমত
এবাৰ এটা সাক্ষাৎকাৰত অমিত শ্বাহক সোধা হৈছিল – বিজেপিয়ে ২০১৯ ৰ নিৰ্বাচনৰ প্ৰস্তুতি কেতিয়াৰ পৰা আৰম্ভ কৰিছিল ? এখন্তেকো পলম নকৰাকৈ তেওঁ উত্তৰ দিছিল -আমি ২০১৪ ৰ মে’ মাহৰ পৰাই প্ৰস্তুতি আৰম্ভ কৰিছিলো ৷ বিৰোধীয়ে নিৰ্বাচনৰ ৰণনীতি ঠিক কৰাৰ পূৰ্বেই বিজেপিৰ বিজয় নিশ্চিত বুলি আশ্বস্ত হৈছিল অমিত শ্বাহ ৷ এই কথা প্ৰত্যয়ৰে অৱগত কৰিছিল প্ৰধানমন্ত্ৰী নৰেন্দ্ৰ মোদীক ৷ ফলাফল ওলাল ৷ পুৰষ্কৃত হ’ল অমিত শ্বাহ ৷বহু জেষ্ঠ্য ৰাজনীতিকক অতিক্ৰমি দেশৰ গৃহমন্ত্ৰী পদত অধিষ্ঠিত হ’ল তেওঁ৷ আৰু আজি বিজেপি নেতৃত্বাধীন চৰকাৰৰ দ্বিতীয়টো কাৰ্যকালৰ প্ৰথম বৰ্ষপূৰ্তিত যদি মেন অৱ দ্য মেচ খিতাপৰ কোনোবা দাবীদাৰ আছে -তেওঁ একমাত্ৰ অমিত শ্বাহ ৷ প্ৰধানমন্ত্ৰী নৰেন্দ্ৰ মোদীৰ সোঁহাত আৰু সেনাপতি ৷ অমিত শ্বাহক গৃহমন্ত্ৰীৰ দায়িত্ব দিয়াৰ পাছৰ পৰাই স্পষ্ট হৈ পৰিছিল যে দলটোৰ আদৰ্শগত ঘোষণাবোৰ কাৰ্যকৰী কৰাৰ ক্ষেত্ৰত এইবাৰ অকনো পলম নহ’ব ৷ লাহে লাহে সকলোবোৰ কথা এফালৰ পৰা পৰিষ্কাৰ হৈ গৈ থাকিল ৷ প্ৰথমতে তেওঁ প্ৰত্যাহাৰ কৰিলে জন্মু কাশ্মীৰৰ পৰা ৩৭০ অনুচ্ছেদ ৷ কেৱল সেয়াই নহয় , দ্বিখণ্ডিত কৰি পেলালে জন্মু কাশ্মীৰক ৷ কোনো বিতৰ্কৰ অৱকাশ নাৰাখি তেওঁ আধাতে স্তব্ধ কৰা হ’ল অমৰনাথ যাত্ৰা ৷ জন্মু কাশ্মীৰত সেনাৰ সমাগম বঢ়াই দিয়া হ’ল ৷ কিন্তু কোনেও ঘূণাক্ষৰেও গম নাপালে যে অমিত শ্বাহে এনে এটা বৃহৎ সিদ্ধান্ত লোৱা দিশে অগ্ৰসৰ হৈছে ৷ অৱশেষত কাকো আপত্তি প্ৰদৰ্শনৰ বিশেষ সুযোগ নিদি তেওঁ জন্মু কাশ্মীৰৰ পঞ্চায়ত আইনো সলনি কৰি পেলালে ৷ তাৰ পাছতে আহিল নাগৰিকত্ব আইনৰ সংশোধন ৷ এই সংশোধনী আইনৰ বিৰুদ্ধে কেৱল অসমতে আন্দোলন হোৱা নাছিল ৷দৃষ্টিভংগী পৃথক হ’লেও সমগ্ৰ দেশত নাগৰিকত্ব সংশোধনী আইনৰ বিৰুদ্ধে জোৰদাৰ প্ৰতিবাদ হ’ল ৷ কিন্তু নিজৰ স্থিতিৰ পৰা এক ইঞ্চিও পিছুৱাই নহাৰ সিদ্ধান্তত অবিচল হৈ ৰ’ল অমিত শ্বাহ ৷ ইয়াৰ জৰিয়তে তেওঁ বাংলাদেশ ,পাকিস্থান আৰু আফগানিস্থানৰ ধৰ্মীয় সংখ্যালঘুসকলক ভাৰতত নাগৰিকত্ব প্ৰদানৰ পথ প্ৰশস্ত কৰি পেলালে ৷ কিন্তু সমগ্ৰ দেশৰ বাবে এন আৰ চি প্ৰস্তুত কৰা হ’ব বুলি সংসদত কৰা এক ঘোষণাই সমগ্ৰ দেশক একপ্ৰকাৰ অগ্নিকুণ্ডত পৰিণত কৰিলে ৷ সংখ্যালঘু সমাজৰ মাজত আতংকৰ বাতাবৰণ বিয়পি পৰিল ৷ অৱশেষত প্ৰধানমন্ত্ৰী নৰেন্দ্ৰ মোদীয়ে ৰামলীলা ময়দানৰ পৰা স্পষ্ট কৰিবলগা হ’ল যে এন আৰ চি সন্দৰ্ভত কেবিনেটত এতিয়াও কোনো সিদ্ধান্ত হোৱা নাই৷ এন আৰ চি , কাৰ বিতৰ্কৰ যৱনিকা নপৰোতেই আকৌ আহিল ক’ভিড-১৯ ৷ ক’ৰোনা বিৰোধী যুজঁতো স্বাস্থ্য বিভাগতকৈ প্ৰধানমন্ত্ৰীৰ দৃষ্টিত বেছি গুৰুত্ব পালে অমিত শ্বাহৰ গৃহ বিভাগে ৷ কাৰণ ,লকডাউন আছিল এক সম্পূৰ্ণ প্ৰশাসনিক বিষয় ৷প্ৰথম অৱস্থাত বিশ্বৰ আন বহু দেশে কৰাৰ দৰেই প্ৰধানমন্ত্ৰী মোদীয়েও লকডাউনকে ক’ৰোনাৰ বিৰুদ্ধে যুজাৰ একমাত্ৰ পথ হিচাপে ল’লে ৷ তেওঁ ২৪ মাৰ্চত ২১ দিনীয়া লকডাউন ঘোষণা কৰি ইয়াক মহাভাৰতৰ যুদ্ধৰ লগতো তুলনা কৰিলে ৷ তাৰ পিছত সময়ে সময়ে দেশত কি খুলিব ,কি বন্ধ থাকিব তাৰ নিৰ্দেশনাও আহি থাকিল অমিত শ্বাহৰ গৃহ বিভাগৰ পৰাই ৷ কিন্তু এইবাৰ অমিত শ্বাহৰ সন্মুখত আহি পৰিল আটাইতকৈ ডাঙৰ প্ৰত্যাহ্বান ৷ লাখ লাখ ক্ষুধাতুৰ শ্ৰমিকৰ ৰাজপথত হোৱা সীমাহীন বিলাই বিপত্তি আন্ত:ৰাষ্ট্ৰীয় বিষয় হৈ পৰিল ৷ অগণিত ৰাইজৰ দুৰ্দশাক সময়মতে বুজি উঠাত এইবাৰ ব্যৰ্থ হ’ল অমিত শ্বাহ ৷ লকডাউনৰ চম্বিত সিদ্ধান্ত আৰু তাৰ পিছৰ পৰিস্থিতি ক’ৰোনাতকৈ কোনোগুণে কম প্ৰত্যাহ্বানমূলক নাছিল ৷ ইয়াৰ লগত মোকাবিলা কৰাৰ কোনো প্ৰস্তুতি নাছিল কেন্দ্ৰৰ৷ কিন্তু তাৰ পাছতো নম্বৰ কটা নগ’ল অমিত শ্বাহৰ ৷ এতিয়াও প্ৰধানমন্ত্ৰীৰ একেবাৰে সোকাষত তেওঁৰ স্থান ৷ আজিও মোদীৰ দৰবাৰত অমিত শ্বাহে সেনাপতিৰ মৰ্যদাই লাভ কৰি আছে ৷ আনকি নাগৰিকত্ব সংশোধনী আইন যিদিনা সংসদত গৃহীত হৈছিল সিদিনা প্ৰধানমন্ত্ৰী নৰেন্দ্ৰ মোদী নিজেই সদনৰ পৰা আতৰি আছিল ৷ মোদীয়েও বিচাৰিছিল যে এই কৃতিত্বৰ অংশীদাৰ অমিত শ্বাহ অকলেই হওক ৷ হয়তো এনেদৰেই নৰেন্দ্ৰ মোদীয়ে তেওঁৰ উত্তৰসূৰী এজন গঢ় দি গৈছে ৷
(প্ৰকাশিত লেখকৰ মন্তব্য নিজা)
Click here to like us on Facebook. Don’t miss our video reports as well. Click here to subscribe us on Youtube.